Абдуқодир Ҳусановнинг жаҳон футболи гигантларидан бири "Манчестер Сити"га 41 миллион долларлик трансфери 20 яшар бу футболчини Англия Премьер-лигасига етиб борган биринчи марказий осиёликка айлантирди. Унинг ажойиб ва ғайриодатий йўли 35 миллиондан ортиқ аҳолиси бўлган мамлакатдаги ёш футболчилар учун намуна.
Сўнгги ҳафталарда Абдуқодир Ҳусанов номини қидирган ҳар қандай футбол мухлиси унинг ўз жамоаси дарвозасига хавф солаётган рақибни тўхтатиш учун майдоннинг деярли бутун узунлиги бўйлаб югурганини акс эттирган видеога кўзи тушган бўларди.
Хабарларга кўра, Ҳусанов бу чақмоқдек югуриш пайтида соатига 37 километр тезликка эришган. Бу тезлик 20 ёшли футболчини ўз ўрнида дунёдаги энг тез ўйинчилардан бирига айлантирган.
Унинг нисбатан нотаниш ёш ўйинчидан Англия Премьер-лигасига етиб келган биринчи марказий осиёлик футболчига айланиши янада тезроқ юз берди. Бу эса ватанидаги миллионлаб футболга ошуфта ёшларга илҳом манбаи бўлиб хизмат қилмоқда.
Тезлиги ва жисмоний қуввати уйғунлиги туфайли "поезд" лақабини олган Ҳусановни қабул қилган клуб оддий инглиз жамоаси эмас.
Бу клуб – сўнгги етти мавсумнинг олтитасида дунёнинг энг бой лигаси ғолиби бўлган ва барча даврларнинг энг буюк футбол мураббийларидан бири деб тан олинган Пеп Гвардиола бошчилигидаги "Манчестер Сити"дир. Трансфер нархи, хабарларга кўра, 41 миллион АҚШ долларига баҳоланган.
"Бу ўзбекистонлик ёш футболчилар, умуман олганда, бутун Марказий Осиё минтақасидаги футболчилар учун катта рағбат бўлади," – дейди Ўзбекистон "Спорт" телеканали шарҳовчиси Отабек Жўраев.
"Тасаввур қилинг, 20 ёшли ўзбекистонлик футболчи эҳтимол дунёдаги энг кучли жамоага ўтди! Қандай илҳом манбаи бу!" Жўраев яна қўшимча қилишича, энди бутун дунё бўйлаб футболчи изловчилар Марказий Осиё ўйинчиларига кўпроқ эътибор қаратишлари мумкин.
Камроқ юрилган йўл
Ўзбекистон пойтахти Тошкентдаги бир нечта футбол журналистлари Ҳусановни яхши билмасликларини ёки умуман танимасликларини тан олишди.
Аслида, у фақат ўтган йилдагина Қатардаги ОФК Осиё кубоги ва Париждаги ёзги Олимпия ўйинларида ажойиб ўйин кўрсатиб, миллий терма жамоа таркибида доимий ўрин эгаллади.
Жўраевнинг фикрича, Ҳусанов 2022 йилда "мураббий унда қобилият кўрмагач ёки алоҳида эътибор бермагач" Ўзбекистоннинг "Бунёдкор" клубини тарк этади ва қисқароқ йўлдан бориб наф кўрган бўлиши мумкин.
Кўпчилик ўзбекистонлик футболчилар сингари Россия ёки Туркияга йўл олиш ўрнига, Ҳусанов ўз агенти Ғайрат Хасбиуллин ва собиқ профессионал футболчи бўлган отаси Ҳикматжон Ҳошимов маслаҳатига қулоқ тутиб, Беларуснинг "Энергетик-БГУ" клубига қўшилди.
Беларус пойтахти Минскдаги бошқа клубларга қараганда камроқ маблаққа эга бўлса-да, "Энергетик-БГУ" Марказий Осиё футболини яхши билган, Қозоғистондаги жамоаларга мураббийлик қилган ва Қозоғистон футбол федерациясида ишлаган харизматик беларус мураббийи Анатол Юревич раҳбарлигида қайта шакллантирилганди.
"Улар пулни биринчи ўринга қўйишмади, – деди Жўраев Ҳусановнинг жамоаси ҳақида, – аксинча, футболчининг ривожланишига энг мос келадиган спорт лойиҳасини танладилар".
Ҳусанов Беларусда бир ярим мавсум ўтказди ва беларус футбол таҳлилчиси Микалай Ходасевичнинг таъкидлашича, "куч, тезлик ва хотиржамлик" билан ажралиб турадиган ўйини учун Беларус олий лигасининг рамзий "мавсум жамоаси"га киритилди.
Бироқ иқтисодий қийинчиликларни бошдан кечираётган клуб 2023 йил ёзида Ҳусановни атиги 100 минг доллардан сал кўпроқ эвазига сотди. Шундай қилиб, у " Ланс" жамоасига қўшилиб, Франция олий лигасида ўйнаган биринчи ўзбекистонлик футболчига айланди.
Франция орқали Англияга
Сўнгги йилларда Марказий Осиёда футбол ривожи ижобий йўналишда бўлди. 2002 йилда Осиё мусобақаларидан Европа мусобақаларига ўтишга қарор қилган Қозоғистон йирик турнирга саралаш босқичида ўзининг энг яхши натижасини кўрсатди. Данияга қарши кутилмаган ғалабага эришиб, Евро-2024 мусобақасига йўлланмани қўлга киритишга яқин келди.
Тожикистон ва Ўзбекистон Осиё кубогининг чорак финалига чиқди, Ўзбекистон эса фақат мезбон ва кейинчалик ғолиб бўлган Қатарга пенальтилар сериясида мағлуб бўлди.
ҲусановЎзбекистондан кетганидан бери миллий терма жамоа ФИФА рейтингида 85-ўриндан 58-ўринга кўтарилди.
Бироқ, тараққиётнинг энг яхши кўрсаткичи шуки, ўзбекистонликлар энди турли хорижий лигаларда ўйнамоқда.
Миллий терма жамоа сардори Элдор Шомуродов 2020 йилда ўз мамлакатидан Италия А сериясига чиққан биринчи футболчи бўлди, аммо у ҳозирда "Рома"да захира ўйинчиси ҳисобланади.
Ҳусановҳам Францияда дастлаб захира ўриндиғида ўтирган, аммо кейинчалик жамоага мослашиб, ўзининг жанговар ёндашуви туфайли олқишланди ва Европанинг энг нуфузли клублар мусобақаси – UEFA Чемпионлар Лигасида ўйнаган энг ёш ўзбекистонлик бўлди.
"Манчестер Сити" жамоасига кириш янада қийинроқ бўлади, чунки бу ерда ҳатто ҳимоячилардан ҳам техник маҳоратни намойиш этиш талаб қилинади.
Бироқ, у аллақачон клубдаги энг тез ўйинчи бўлиши мумкин, чунки бир пайтлар жуда тез бўлган инглиз футболчиси Кайл Уокернинг тезлиги пасайган ва норвегиялик супер юлдуз Эрлинг Холанн бу мавсумда клубнинг энг юқори тезлигини – соатига 35,7 километрни қайд этган.
Ҳар ҳолда, Жўраевнинг айтишича, бу трансферни "Ўзбекистон футболи учун келажакда натижа берадиган тўлқинларни ҳосил қиладиган катта сув ости портлашига" қиёслаш мумкин.
Форум